O III Encontro de Expertos Contables na Coruña consolida o papel do profesional nas operacións de M&A

📸 VER GALERÍA DE FOTOS | O Club Cámara Noroeste da Coruña converteuse o pasado día 21 de xaneiro no epicentro da análise financeira coa celebración do III Encontro de Expertos Contables. A xornada, organizada polo Colexio de Economistas da Coruña e a Agrupación Territorial 4ª Galicia do ICJCE en colaboración co Rexistro de Expertos Contables REC] do Consello Xeral de Economistas e do Instituto de Censores Xurados de Contas de España, reuniu a especialistas para debater sobre a crecente complexidade das operacións corporativas e as novas guías de actuación profesional. 

A apertura do encontro correu a cargo de Salvador Marín Hernández, presidente de EC Economistas Contables-CGE e vicepresidente do REC, quen estivo acompañado por Fernando Cuñado García-Bernalt, presidente do REC. Durante a inauguración, ambos destacaron a importancia da colaboración entre as institucións para impulsar a excelencia técnica e subliñaron o papel vital que o experto contable desempeña na transparencia e seguridade do mercado financeiro actual.

A primeira sesión técnica foi protagonizada polo propio Fernando Cuñado García-Bernalt, quen, na súa calidade de coautor da Guía nº 6 do REC], analizou o papel crucial do experto independente na dimensión transaccional da compravenda de empresas.

Tras unha pausa para o intercambio de impresións entre os asistentes, a xornada continuou coa análise da Fairness Opinion (Opinión de Equidade). O relatorio correu a cargo de Ane Martín Larriu, Directora en PwC Deals - Valuation & Strategy, quen profundou na función deste informe como garante de transparencia nas operacións corporativas, abordando os retos prácticos que supón a análise independente, especialmente cando se trata de contextos transnacionales onde a normativa e as valoracións adquiren unha capa extra de complexidade.

O encontro foi clausurado por Miguel Corgos López-Prado, Conselleiro de Facenda e Administración Pública da Xunta de Galicia, que subliñou a relevancia destes foros para manter a competitividade do tecido empresarial galego. Estivo acompañado por José Canalejas, Decano do Colexio de Economistas da Coruña, e Enrique González, presidente da Agrupación Territorial 4ª Galicia do Instituto de Censores Xurados de Contas, quen coincidiron na necesidade da formación continua nunha contorna cada vez máis esixente.