Celebración San Pablo 2024: seguimos facendo Colexio

* Pica na imaxe para ver a galería de fotos.

O pasado 21 de xuño máis de douscentos colexiados e familiares reunímonos nas instalacións de Palexco, na Coruña, para asistir ao acto de celebración da festividade de San Pablo, patrón dos Economistas.

O inicio do acto, conducido polo coñecido xornalista Pablo Portabales, estivo protagonizado polo acto de benvida aos colexiados que se incorporaron ao Colexio desde a celebración de San Pablo 2023 ata a data. A colexiada encargada de pronunciar unhas palabras en representación dos novos colexiados foi Candela Chacón Piñeyro, quen valorou moi positivamente a posibilidade de fomentar e manter relacións con colegas de profesión: “Aínda que cada un dos novos colexiados temos as nosas razóns para incorporarnos ao Colexio, no meu caso particular, un dos motivos fundamentais foi o de sentimento de pertenza a un colectivo profesional e o poder estreitar vínculos de unión e xerar relacións cos compañeiros, tanto a nivel profesional como persoal”, sinalou.

Continuou a celebración coa entrega dos títulos do Máster en Fiscalidade e Tributación do Colexio, sendo nesta ocasión os alumnos da décimo sexta promoción quen recibiron o seu merecido diploma.

Agustín Fernández, director do Máster, dirixiu as súas palabras aos alumnos, dándolles as grazas en primeira instancia por “confiarnos a vosa formación, que é como dicir o voso cartón de presentación no mundo laboral”, para continuar asegurando que “os coñecementos que adquiristes redundarán positivamente no modo de entender e de exercer unha materia, a tributaria, apaixonante, pero complexa”.

Finalizou a súa intervención cunha reflexión moi aplaudida: “Crede en vós e fomentade o factor humano. Non minusvaloréis a importancia da empatía e a comprensión no voso traballo. Tede presente que o papel do fiscalista vai máis aló dos números e as leis; é tamén unha responsabilidade ética e moral”.

A alumna que falou en representación dos seus compañeiros, Carlota Brea Lueiro, compartiu cos asistentes unha sinxela reflexión, en alusión ao Máster cursado: “Valeu a pena”. A continuación sinalou que “obviamente, non o aprendemos todo sobre fiscalidade, pois sabedes que esta materia nos obriga a unha constante actualización de coñecementos, pero creo firmemente nas bases que adquirimos”, para terminar agradecendo ao profesorado “o seu sapiencia e dedicación para facernos o camiño máis sinxelo e ameno”.

A continuación tivo lugar a entrega dos donativos recadados no curso "Declaración da Renda 2023", celebrado o pasado mes de abril, a distintas entidades benéficas locais, que correu a cargo do Decano, Miguel Vázquez Taín e de José Canalejas, Vogal da Xunta de Goberno.

O acto central do evento constituíuno a homenaxe aos 38 colexiados que ao longo deste ano cumpren un cuarto de século de pertenza ao noso Colexio. Tras a entrega do diploma e a insignia do Colexio, foi Alberto Soto Villanueva quen tomou a palabra en representación dos seus compañeiros. En primeiro lugar dirixiuse aos novos colexiados para animalos a sacar partido do Colexio: “No meu caso, logrei a miña primeira bolsa a través da Institución e cursei o Máster en Auditoría de Contas que ofrecían naquel momento”.  Ademais de pór en valor o traballo e a capacidade de adaptación dos seus compañeiros de colegiación ao longo do último cuarto de século, quixo ter un recoñecemento especial “para aqueles que como eu tivémonos que desprazar a traballar fóra, pois moitas veces é complicado, sobro todo ao comezo”. Pechou a súa intervención indicando que “somos a suma das decisións que tomamos, e a todos os presentes esas decisións leváronnos esta noite ata aquí”.

A continuación foi o decano do Colexio, Miguel Vázquez Taín, quen tomou a palabra, vertebrando a primeira parte da súa intervención na palabra “grazas”: “Aos novos colexiados a aposta polo Colexio, utilizádenos e implicádevos nas nosas actividades; aos alumnos do Máster por elixir o noso programa formativo, aos colexiados de prata pola súa incuestionable fidelidade e polo voso labor desenvolvido ao longo de todo este tempo, e ás institucións benéficas polo voso traballo en prol dos máis desfavorecidos”.

Posteriormente, reivindicou o traballo dos profesionais da economía –“a sociedade xa está a ser consciente da vosa valía”– e puxo en valor a figura do economista colexiado, “pois a diferenza con quen non o está non é nin moito menos menor”.

O acto concluíu coa intervención de Miguel Corgos López-Prado, Conselleiro de Facenda e Administración Pública, quen minutos antes xa subira ao estrado para recoller o seu diploma e insignia polos seus 25 anos de colegiación.

Tras felicitar a todos os homenaxeados quixo valorar a achega da Institución colexial, “que non só nos serve de guía senón que nos brinda a tan necesaria formación de reciclaxe e eríxese nun privilexiado foro de profesionais con intereses comúns”.  A continuación resaltou o traballo de todos os profesionais, en especial os do sector público, “pola súa capacidade de análise, de interpretación e de capacidade para atopar solucións óptimas”. Finalizou as súas palabras indicando que desde a Xunta de Galicia xa se atopan en plena preparación do orzamento de 2025, “que chegarán nun contexto complicado e infestado de incerteza no cal os economistas estamos chamados a xogar un papel crave”.

Á celebración acudiron representantes da administración autonómica e local, de entidades financeiras e organizacións empresariais ou do ámbito universitario, tales como o mencionado Conselleiro de Facenda, Belén Do Campo Piñeiro e Martina Aneiros Barros, delegadas territoriais da Xunta na Coruña e Ferrol, respectivamente; Juan Carlos Reboredo Nogueira, Secretario Xeral da Oficina de Coordinación Económica da presidencia da Xunta; Fernando González Laxe, expresidente da Xunta e Colexiado de Honra do Colexio de Economistas coruñés; ou José Javier Orosa, Vicedecano de Estudantes e Comunicación da Facultade de Economía e Empresa da Universidade da Coruña, entre outros.

A celebración de San Pablo finalizou cun coctel no que todos os asistentes tivemos a oportunidade de compartir uns momentos de asueto e cordialidade para, en definitiva, seguir FACENDO COLEXIO.